Юлдаш
+21 °С
Болытлы
Барлык яңалыклар
Җәмгыять
26 июнь 2019, 02:00

Австрияла Башҡортостан Республикаһы көндәре уҙҙы

Австрияла Башҡортостан Республикаһы көндәре уҙҙы. Рәсми делегацияны Башҡортостан Башлығы вазифаһын ваҡытлыса башҡарыусы Радий Хәбиров етәкләне.

Республика Башлығының матбуғат хеҙмәтенән хәбәр итеүҙәренсә, сәфәрҙең эшлекле программаһында Австрияның власть һәм бизнес вәкилдәре менән эшлекле осрашыуҙар, төбәктең инвестиция ҡеүәте менән таныштырыу, шулай уҡ уңайлы ҡала мөхитен булдырыу өлкәһендә тәжрибә алмашыу ҡаралғайны. Атап әйткәндә, Радий Хәбиров Австрия коллегалары менән бергә Венаның үҙәк вокзалына барҙы, унда вокзал һәм вокзал яны биләмәләрен үҫтереүҙең инфраструктура проекттары менән танышты.

Австрия баш ҡалаһының Музей кварталында башҡорт халҡының көнкүреше, мәҙәниәте һәм аш-һыуы күрһәтелгән милли ихата ойошторолғайны. Ошонда уҡ Һабантуй үтте, байрам этно-шоу һәм Башҡортостандың сәнғәт оҫталары концерты менән тамамланды. Унда Ф.Ғәскәров исемендәге дәүләт академия халыҡ бейеүҙәре ансамбле, Милли халыҡ уйын ҡоралдары оркестры, «Арғымаҡ» һәм «Карауан» төркөмдәре, Башҡортостандың халыҡ артисы Айҙар Ғәлимов һәм башҡа йырсылар ҡатнашты.

Республика етәксеһе Радий Хәбиров Һабантуй ҡунаҡтарына сәләмләү һүҙен немец телендә башланы.

«Бөгөн һеҙҙең менән бергә булыуыбыҙға бик шатбыҙ. Беҙ Венаға күп милләтле илебеҙҙең бер өлөшөн алып килдек. Башҡортостан – ҙур тарихлы республика. Беҙҙә мосолмандар ҙа, христиандар ҙа оҙаҡ йылдар үҙ-ара дуҫ, татыу йәшәй. Республикала 100-ҙән ашыу милләт бар. Башҡортостан – Рәсәй Федерацияһының иҡтисады үҫешкән терәк төбәктәренең береһе.
Шуға күрә бөгөн һеҙгә үҙебеҙ хаҡында һөйләргә һәм барығыҙҙы ла һоҡланғыс Башҡортостаныбыҙға саҡырыу өсөн килдек. Ваҡытығыҙҙы матур итеп үткәреүегеҙҙе теләйем», — тине республика етәксеһе.

«Башинформ» мәғлүмәт агентлығы


Читайте нас: